TELUKKUANTAN, (RIAUPOS.CO) - Dek makin banyak batambah jia kasus corona di Kuansing, makin pendek langkah rang Kuansing. Dulu, warga Kuansing dak payah mancari tompek rekreasi de. Kini, tompek wisata ado, tapi dak bisa masuak de.
"Iko nan kami rasoan kini. Dulu, ampia setiok pokan kami mandi ka ayiar tojun di Hulu Kuantan. Tapi sajak corona ge, duo objek wisata andalan Kuansing ge lah ditutuik. Kamano kami kan main lai," baitu kato salah sorang warga Kampuang Baru Kecamatan Gunung Toar banamo Has Novel, Rabu (16/9).
Novel mangecek, memang ado babarapo objek wisata yang tetap dibukak untuak umum, namun untuak keluarga, terutamo bagi nan punyo anak-anak ketek akan payah.
"Kalau awak nan punyo anak-anak ketek, cocoknyo memang di pemandian ayiat tojun Tangogan nan di Hulu Kuantan tu nye. Situ lengkap, ntuak rang godang ado lo. Nan jole, ayiarnyo barosia dan mengalir," kato Novel.
Novel baarok ka pemerintah kabupaten supayo memerintahkan pemerintahan desa Lubuk Ambacang mambuka objek wisata nan ado di Hulu Kuantan.
"Yo, tontu harus mangacu ka protokol kesehatan. Kalau parolu, diadokan cek suhu dan mewajibkan panggunoan masker setiok pangunjuang nan tibo. Kalau parolu, rang di luar Kuansing, jangan diizinkan masuak," usul Novel. (yas)
